Իրադարձություններ
Էպոսագիտական 6-րդ գիտաժողովը և դրա նախապատմությունը
Հայաստանում անցկացված էպոսագիտական վեց միջազգային գիտաժողովներին մասնակցել են ընդհանուր առմամբ ավելի քան 100 հետազոտողներ Հայաստանից, ԱՄՆ-ից, ՌԴ-ից, Հնդկաստանից, Իրանից, Վրաստանից, Աբխազիայից, Գերմանիայից, Ֆրանսիայից, Մեծ Բրիտանիայից, Հոլանդիայից, Սերբիայից, ինչպես և ինքնավար հանրապետություններից՝ Հյուսիսային Օսիա-Ալանիա, Չեչնիա,Ադըղիա, Դաղստան, Կալմիկիա, Ուդմուրտիա։ Էպոսագիտական 1-ին միջազգային գիտաժողովը տեղի է ունեցել 2003 թ․ նոյեմբերի 4-ից 6-ը Ծաղկաձորում, գիտաժողովը կոչվում էր «Հայկական «Սասնա ծռեր» էպոսը և համաշխարհային էպիկական ժառանգությունը», կազմակերպվել էր ՀՀ ԳԱԱ երկու ինստիտուտների համատեղ նախաձեռնությամբ՝ Մ․ Աբեղյանի անվան գրականության ինստիտուտի ու Հնագիտության և ազգագրության ինստիտուտի, ինչպես նաև ՅՈՒՆԵՍԿՕ-ի գործերով Հայաստանի ազգային հանձնաժողովի օժանդակությամբ։ Երկրորդ գիտաժողովը տեղի ունեցավ 3 տարի անց՝ 2006 թ․ հունիսի 23-24-ին Ծաղկաձորում և Թալինում, փոքր-ինչ փոխված խորագրով՝ «Հայկական ժողովրդական էպոսը և համաշխարհային էպիկական ժառանգությունը», և այս անգամ՝ ՀՀ Կառավարության աջակցությամբ, բայց կրկին նույն ինստիտուտների նախաձեռնությամբ։ Էպոսագիտական 3-րդ գիտաժողովը կազմակերպվեց ՀՀ ԳԱԱ Հնագիտության և ազգագրության ինստիտուտի և Հայ-ռուսական (սլավոնական) համալսարանի հայ գրականության գիտահետազոտական կենտրոնի նախաձեռնությամբ, անցկացվեց Երևանում 2009 թ․ նոյեմբերի 12-ից 14-ը՝ «Հայ ժողովրդական էպոսը և համաշխարհային էպիկական ժառանգությունը» խորագրով։ Էպոսագիտական 4-րդ գիտաժողովը տեղի ունեցավ նորից Ծաղկաձորում՝ 2012 թ․ հոկտեմբերի 8-ից 10-ը, այս անգամ՝ միայն Հնագիտության և ազգագրության ինստիտուտի նախաձեռնությամբ, սակայն ինչպես և նախորդ երեք գիտաժողովները՝ հիմնականում պրոֆեսոր Ազատ Եղիազարյանի ջանքերով։ Գիտաժողովն ուներ հատուկ թեմատիկ ուղղվածություն՝ նվիրված էր հայկական և կովկասյան ժողովուրդների էպոսներին և դրանց միջև եղած կապերին։ Էպոսագիտական 5-րդ գիտաժողովն անցկացվեց 2017 թ․ հոկտեմբերի 11-ից 13-ը Սլավոնական համալսարանում, կազմակերպիչներն էին՝ Հայ-ռուսական (սլավոնական) համալսարանը, ՀՀ ԳԱԱ Հնագիտության և ազգագրության ինստիտուտն ու Կալիֆորնիայի Լոս-Անջելեսի համալսարանը (UCLA)։ Յոթնամյա ընդմիջումից հետո տեղի ունեցավ Էպոսագիտական 6-րդ միջազգային գիտաժողովը, այս անգամ՝ «Էպոս, ինքնություն և մշակույթ» վերտառությամբ, Հնագիտության և ազգագրության ինստիտուտի նախաձեռնությամբ ու Հայագիտական ուսումնասիրությունները ֆինանսավորող համահայկական հիմնադրամի աջակցությամբ։ Գիտաժողովը նվիրված էր էպոսի առաջին հայտնի պատումի՝ «Սասունցի Դաւիթ կամ Մհէրի դուռ» հրատարակության 150-ամյակին, որով փաստորեն նշվում էր «Սասնա ծռեր»-ի գիտական ուսումնասիրության մեկուկեսդարյա հոբելյանը։ Շնորհակալություն Hayk Hambardzumyan ին, ում գաղափարով ծագեց էպոսագիտական 6-րդ գիտաժողով անցկացնելու միտքը, @Peter Cowe ին, ով նույնպես ակտիվ մասնակցություն ունեցավ կազմակերպչական աշխատանքներին և հատկապես ողջ գիտաժողովի ընթացքում սինխրոն թարգմանություն ապահովելու գործին, Azat Yeghiazaryan ին, ով գործուն մասնակցություն ունեցավ գիտաժողովի հետ կապված մի շարք կազմակերպչական հարցերում, Armen Petrosyan ին` բազմաթիվ օգտակար խորհուրդների համար։ Նաև, գիտաժողովն անհնար կլիներ կազմակերպել առանց Ինստիտուտի երիտասարդ աշխատակիցների ջանասիրության և անձնվեր աշխատանքի։
2024-10-22
Հոկտեմբերի 10-12 Վրաստանի մայրաքաղաք Թբիլիսիում անցկացվեց Արխիվի 9-րդ միջազգային գիտաժողովը
Հոկտեմբերի 10-12 Վրաստանի մայրաքաղաք Թբիլիսիում անցկացվեց Արխիվի 9-րդ միջազգային գիտաժողովը։ Հնագիտության և ազգագրության ինստիտուտի Բանահյուսության տեքստաբանության բաժնի գիտաշխատող, բ.գ.թ. Հասմիկ Գալստյանն ու Վաղ հնագիտության բաժնի կրտեսեր գիտաշխատող Անի Սարատիկյանը հանդես են եկել «Ջրօգտագործման մշակույթը Հայաստանում ըստ 20-րդ դարի արխիվային տվյալների» վերնագրով զեկուցմամբ։ Ուսումնասիրությունն իրականացվել է "Ջրօգտագործման մշակույթը Հայաստանում հնագույն ժամանակներից մինչև մեր օրերը" գիտական թեմայի շրջանակում։
2024-10-14
«Էպոս, ինքնություն և մշակույթ» խորագրով միջազգային 6-րդ գիտաժողով
Հնագիտության և ազգագրության ինստիտուտի նախաձեռնությամբ և «Հայագիտական ուսումնասիրությունները ֆինանսավորող համահայկական հիմնադրամ»-ի աջակցությամբ՝ հունիսի 11-ին ՀՀ Գիտությունների ազգային ակադեմիայի կլոր դահլիճում մեկնարկեց «Էպոս, ինքնություն և մշակույթ» խորագրով միջազգային 6-րդ գիտաժողովը՝ նվիրված «Սասնա ծռեր» էպոսի ուսումնասիրության 150-ամյակին: Գիտաժողովին մասնակցում էին հետազոտողներ և արվեստագետներ Հայաստանից, ԱՄՆ-ից, Ռուսաստանից, Աբխազիայից, Կալմիկիայից, Թուրքիայից, Հոլանդիայից: Գիտաժողովի մասնակիցներին բացման խոսքով ողջունեց ՀՀ ԳԱԱ Հնագիտության և ազգագրության ինստիտուտի տնօրեն, պ․գ․թ․ Արսեն Բոբոխյանը՝ կարևորելով էպոսի դերը և դրան նվիրված միջազգային գիտաժողովը կազմակերպումը: Ապա ողջույնի խոսքով հանդես եկան ՀՀ ԳԱԱ Հայագիտության և հասարակական գիտությունների բաժանմունքի ակադեմիկոս-քարտուղար, տ․գ․դ․ Յուրի Սուվարյանը, «Հայագիտական ուսումնասիրությունները ֆինանսավորող համահայկական հիմնադրամ»-ի նախագահ, պ․գ․դ․, պրոֆեսոր Արման Եղիազարյանը, Հայ-ռուսական սլավոնական համալսարանի պրոֆեսոր, բ.գ.դ. Ազատ Եղիազարյանը, UCLA համալսարանի դասախոս, պրոֆեսոր Պիտեր Քաուին: Լիագումար նիստի վարող, Հնագիտության և ազգագրության ինստիտուտի փոխտնօրեն Տորք Դալալյանը շնորհակալություն հայտնեց բոլոր ողջունողներին` գիտաժողովի կազմակերպմանը օժանդակելու համար: Գիտաժողովի առաջին օրը ներկայացվեցին 12 գիտական զեկույցներ, իսկ օրն ամփոփվեց «Շողակաթ» հ/ը նկարահանած «Գրոց և Բրոց հետքերով» տեսաֆիլմի ցուցադրությամբ (հեղինակ՝ Հայկ Համբարձումյան, ռեժիսոր՝ Վահե Սուքիասյան, օպերատոր՝ Վահե Աղամյանը)։ «Էպոս, ինքնություն և մշակույթ» խորագրով միջազգային 6-րդ գիտաժողովը կշարունակվի նաև հոկտեմբերի 12-ին՝ Հնագիտության և ազգագրության ինստիտուտի նիստերի դահլիճում: Հասցե՝ Չարենց 15
2024-10-13
Բանախոսություն «Ֆոտոգրամետրիան հնագիտության ոլորտում» խորագրով
Հոկտեմբերի 10-ին ԱՀ ԳԱԱ Հնագիտության և ազգագրության ինստիտուտի (ՀԱԻ) ընթերցասրահում տեղի ունեցավ հերթական սեմինարը։ ՀԱԻ Ճարտարապետական մոդելավորման գիտահետազոտական խմբի կազմակերպմամբ՝ «Ֆոտոգրամետրիան հնագիտության ոլորտում» թեմայով հանդես եկավ Սոսե Աղայանը։ Բանախոսը ներկայացրեց հնավայրերի ուսումնասիրությունների, պեղումների ընթացքում կատարվող լուսանկարահանման խնդիրները, ֆոտոգրամետրիայի տեսակները և այլն: Վերջում ներկաները հարցեր ուղղեցին բանախոսին, ահանդես եկան առաջարկներով:
2024-10-10
ՀԱԻ Բանագիտության բաժնի աշխատակիցներ Նվարդ Վարդանյանն ու Լուսինե Հայրիյանը մասնակցել են «Կոմիտասի ժառանգությունը պատմական և ժամանակակից հետազոտական տեսանկյուններից» միջազգային գիտաժողովին
Հոկտեմբերի 7-8-ին Վիեննայի Երաժշտության և կատարողական արվեստի համալսարանում տեղի ունեցավ «Կոմիտասի ժառանգությունը պատմական և ժամանակակից հետազոտական տեսանկյուններից» միջազգային գիտաժողովը, որը կազմակերպել էին Կոմիտասի թանգարան-ինստիտուտը, ՀՀ ԳԱԱ Արվեստի ինստիտուտը և Վիեննայի երաժշտության և կատարողական արվեստի համալսարանը՝ Ավստրիայում Հայաստանի Հանրապետության դեսպանության պատվո հովանու ներքո։ Գիտաժողովում համատեղ զեկույցով հանդես եկան նաև ՀՀ ԳԱԱ Հնագիտության և ազգագրության ինստիտուտի Բանագիտության բաժնի ավագ գիտաշխատող, ԵՊՀ դոցենտ Նվարդ Վարդանյանը և նույն բաժնի գիտաշխատող Լուսինե Հայրիյանը: Զեկուցման թեման էր՝ «Ռազմաճակատի երգերը 2020թ. արցախյան 44-օրյա պատերազմում. ավանդականից ժամանակակից դրսևորումներ»: Զեկուցումը նվիրված էր 44-օրյա պատերազմի զոհերի հիշատակին: Ելույթից առաջ հայ և օտարազգի ունկնդիրները մեկ րոպե լռությամբ հարգեցին արցախյան պատերազմի զոհերի հիշատակը: Զեկուցման ժամանակ գիտական քննությամբ ներկայացվեցին մարտադաշտում երգված ռազմի, հայդուկային, գուսանական և հեղինակային երգերը, ինչպես նաև ներկայացվեցին հատվածներ պատերազմի ժամանակ կատարված սիրողական տեսագրություններից: Հետազոտությունը կատարվել էր ՀՕՖ–ի հովանու ներքո գործող Երվանդ Թերզյանի անվան Գիտության և կրթության հայկական ազգային հիմնադրամի (ԳԿՀԱՀ-ANSEF) աջակցությամբ:
2024-10-10
Բանախոսություն՝ ՙՙԱշխարհի բանահյուսության և դիցաբանության տվյալների բազայի ուղու վրա՚՚ խորագրով
Հոկտեմբերի 3-ին ՀՀ ԳԱԱ Հնագիտության և ազգագրության ինստիտուտի ընթերցասրահում ՙՙԲանագիտական քննարկումների՚՚-ի շրջանակում տեղի ունեցավ ՙՙԱշխարհի բանահյուսության և դիցաբանության տվյալների բազայի ուղու վրա՚՚ բանախոսությունը: Ներկա էին ՀԱԻ աշխատակիցներ, ոլորտով հետաքրքրվողներ և այլք: Բանախոսությամբ հանդես եկավ ՌԴ ԳԱ Մարդաբանության և ազգագրության թանգարանի (Կունտսկամերա) Ամերիկայի բաժնի վարիչ, պ.գ.դ Յուրի Բերեզկին:
2024-10-03
